27 траўня выданьне «Наша Ніва» выпусьціла расьсьледаваньне пра беларускага фатографа ў Польшчы Івана Мішчука. У яго знайшоўся дзейны пашпарт прыкрыцьця на імя Івана Мішына. Цяпер сам Мішчук вырашыў патлумачыць сваю гісторыю на адным з форумаў польскіх фатографаў.
«Я ведаю, што вы чакаеце ад мяне інфармацыі. Мне патрэбны быў час сабраць факты, якія зьняпраўджваюць гэтую інфармацыю», — напісаў Мішчук.
Ён зьвяртае ўвагу на тое, што яго ўзрост у артыкуле спачатку быў пазначаны недакладна:
«У мяне няма другога пашпарту, я заехаў па сваім адзіным дакумэнце Івана Валер’евіча Мішчука, а ня нейкага Івана Мішына».
Выданьне, у сваю чаргу, падкрэсьлівае, што ніхто і не сьцьвярджае, быццам ён прыехаў у Польшчу як Мішын — гаворка пра тое, што ў Беларусі яму быў выдадзены пашпарт для выкананьня нейкага заданьня. Якога — невядома.
Фатограф тлумачыць, што ў падзеях 2020 году ня ўдзельнічаў, бо з 7 па 19 жніўня ляжаў у шпіталі з-за каранавірусу.
Таксама ён удакладняе тэхнічныя моманты:
«У паліцыяльнай школе ніколі не вучыўся. Я скончыў Варшаўскую Акадэмію фатаграфіі 24.06.22. Гуманітарная віза была выдадзена ўсяго на 3 месяцы — з 15.12.22 па 15.03.23, а не на год».
«У артыкуле гаворыцца, што мной зацікавіліся ў ByPol і перадалі інфармацыю ў офіс Ціханоўскай, але ў гэты ж час я атрымаў палітычны прытулак у Польшчы. Што супярэчыць таму, што я спэцагент. Калі адны нібыта знайшлі ў мяне другі пашпарт, іншыя далі абарону, бо я супраць рэжыму Лукашэнкі і я не нясу ніякіх пагрозаў», — напісаў Мішчук.
ГЛЯДЗІЦЕ ТАКСАМА: «Кібэрпартызаны»: сужэнцу журналісткі Сямашкі ўлады Беларусі выдалі два пашпарты на розныя імёныАднак атрыманьне палітычнага прытулку ня можа лічыцца аўтаматычным пацьверджаньнем недатычнасьці да беларускіх спэцслужбаў, заўважае «Наша ніва». Нядаўна была гучная гісторыя з былой беларускай журналісткай Натальляй Судлянковай, якая мела палітычны прытулак у Чэхіі і шмат гадоў працавала на расейскі ГРУ. Пасьля рашэньня Чэхіі аб высылцы яна выехала ў Маскву.
Мішчук таксама тлумачыць:
«На працу ў ABBA (Асацыяцыя беларускага бізнэсу за мяжой) не навязваўся, мяне запрасілі здымаць форум, як звычайны запыт, вы мяне разумееце, як ніхто іншы».
Ён адзначыў, што актыўна пісаў усім, бо шукаў працу і хацеў уладкуаваць жыцьцё ў Варшаве, каб перавезьці сям’ю ў бясьпечную краіну. Так патлумачыў сваю матывацыю фатограф.
Акрамя таго, Мішчук паведаміў, што зьвярнуўся па дапамогу да праваабарончага цэнтру «Вясна».
ГЛЯДЗІЦЕ ТАКСАМА: Былая журналістка Натальля Судлянкова, якую ў Чэхіі абвінавацілі ў супрацы з ГРУ, выехала ў Расею