Яго цытуе Міністэрства абароны Беларусі. Заяву Хрэніна на сустрэчы міністраў абароны АДКБ ў Бішкеку апублікавалі па-расейску і па-ангельску.
«Удакладненая задума вучэння, у якой колькасць удзельнікаў скарочана амаль удвая, была зацьверджана яшчэ ў красавіку», — напісаў у сетцы X памочнік міністра абароны Беларусі ў пытаньнях міжнароднай супрацы Валеры Равенка.
Паводле Равенкі, у адказ Польшча выказала намер правесьці «найбуйнейшыя за апошнія гады дывізіённыя манэўры».
«Каб апраўдаць чаканьні польскага боку, на палігоне пад Горадняй будзе арганізавана ротнае тактычнае вучэнне», — напісаў Равенка.
У студзені Равенка паведаміў, што ў вучэньнях возьмуць удзел больш за 13 тысяч чалавек, і яны «плянуюцца як адны з найбольш маштабных за мінулыя гады».
Віктар Хрэнін сказаў, што вайсковыя вучэньні «Захад-2025» не накіраваныя супраць каго-небудзь, а перанос асноўных манэўраў углыб тэрыторыі Рэспублікі Беларусь ад заходніх межаў сьведчыць пра гатоўнасьць да дыялёгу і зьніжэньне напружанасьці ў рэгіёне:
«Інтэнсіўнасьцю і маштабамі вучэньне „Захад“ заўсёды было несупастаўнае з тымі захадамі апэратыўнага і баявога рыхтаваньня, якія праводзяць у Эўропе», — дадаў ён.
Хрэнін таксама заявіў, што «заходнія палітыкі абралі шлях варожасьці і гонкі ўзбраеньняў».
«У сьвядомасьць эўрапейскіх грамадзян сыстэматычна ўкаранялася ідэя непазьбежнасьці новай вайны і браку альтэрнатывы супрацьстаяньню з Расеяй», — сказаў ён.
Паводле яго, мілітарызацыя ў Эўропе і «канкурэнцыя за статус дамінантнай вайскова-палітычнай сілы» можа прывесьці да ваеннага канфлікту.
Ён заклікаў заходнія краіны лічыцца з «аб’ектыўнымі інтарэсамі бясьпекі іншых краін».
У Беларусі 16 траўня з «працоўным візытам» пабываў міністар абароны Расеі Андрэй Белавусаў.
Белавусава адразу прыняў Аляксандар Лукашэнка, паведаміла БЕЛТА. Ішла гутарка аб заплянаваных супольных вайсковых вучэньнях Беларусі і Расеі на беларускай тэрыторыі.
Луашэнка падзякаваў Белавусаву за тое, што Расея знайшла «магчымасьць пастаўкі ў Беларусь закупленых намі ўзораў узбраеньня»:
«Я маю на ўвазе самалёты, верталёты і гэтак далей. Мы вельмі актыўна працуем над пэрспэктыўнымі відамі ўзбраеньняў. Вы ведаеце гэта добра. Рэалізуем задуму, якую мы абмяркоўвалі з Уладзімірам Пуціным, — аб разьмяшчэньні тут самых перадавых відаў зброі для абароны. У тым ліку „Арэшнік“ і гэтак далей. Мы тут значна прасунуліся».
Андрэй Белавусаў заявіў падчас сустрэчы, што «агульную абаронную прастору» Расеі і Беларусі трэба «ўмацоўваць як мага хутчэй».
Апошнім разам Белавусаў быў у Менску ў канцы кастрычніка 2024 году, калі ў беларускай сталіцы праходзіла калегія міністэрстваў абароны дзьвюх краін.
Тады ён сярод іншага заявіў, што Расея гатовая ўжыць ядзерную зброю ў адказ на агрэсію супраць Беларусі.
- Рэжым Аляксандра Лукашэнкі няспынна праводзіць вучэньні, трэнаваньні, зборы падчас абвастрэньня адносінаў з Захадам і поўнамаштабнай вайны Расеі супраць Украіны, у якой афіцыйны Менск падтрымлівае Крэмль.
- На восень 2025 году ўлады Беларусі і Расеі рыхтуюць супольныя маштабныя вучэньні на беларускай тэрыторыі. У кастрычніку летась міністар абароны Беларусі Віктар Хрэнін назваў вучэньні «Захад-2025» «галоўнай падзеяй», да манэўраў плянуецца залучыць больш за 13 тысяч чалавек.
- 30 студзеня начальнік аб’яднанага штабу (АДКБ) заявіў, што, акрамя манэўраў «Захад-2025», у верасьні на беларускай тэрыторыі павінны прайсьці вучэньні «Ўзаемадзеяньне-2025» — з Калектыўнымі сіламі апэратыўнага рэагаваньня, «Пошук-2025» — зь сіламі і сродкамі выведкі й матэрыяльна-тэхнічнага забесьпячэньня.
- Расейскія войскі, якія прыбылі на тэрыторыю Беларусі для ўдзелу ў вучэньнях «Саюзная рашучасьць — 2022» (10–20 лютага), пасьля іх заканчэньня не былі зь яе выведзеныя і выкарыстоўваліся для ўварваньня ва Ўкраіну 24 лютага 2022 году.
